الجمعة، 15 يونيو، 2012

لن أصلي خلف إمام جاهل يستغل الدين

النهاردة الجمعة 15 يونيو 2012  بجد الشيخ بتاع المسجد زودها أوي أوي أوي
و بيهاجم المبطلون بنفس الاسلوب الوسخ 
دول ليبراليين .. دول علمانيين .. دول بيتبعوا أهوائهم 
صوتك شهادة و لازم تشهد بيها 
و قال بالنص "فيه حديث قريته في صحيح مسلم و أنا مقريتش صحيح مسلم كله بس النص ده أبهرني (من مات وليس في رقبته بيعة مات ميتة الجاهلية)" و استشهد بالحديث ده ان اللي ميروحش ينتخب و يشتري له كبير من الآخر يبقي مات ميتة الجاهلية و الحقوا لكو ريس قبل ما تموتوا موتة الجاهلية
قلت حسبي الله و   نعم الوكيل و دمي بيغلي و سكت مرضيتش اعمل موال عشان ميقولوش اني مستقصده و مزقوق عليه
و بعدين جاب بقي الكبيرة بقي 
قال عارفين مين هما المبطلون؟؟؟
قال تعالي في كتابه العزيز "وَمَا كُنتَ تَتْلُو مِن قَبْلِهِ مِن كِتَابٍ وَلا تَخُطُّهُ بِيَمِينِكَ إِذًا لّارْتَابَ الْمُبْطِلُونَ" الآية 48 سورة العنكبوت ... هما دول بقي المبطلون 
مقدرتش استحمل و كان أدامي حل من اتنين يا اقوم اسب له الدين و أكفر في قلب الجامع يا اقوم اخرج و  اسيب الجامع و ده اللي عملته بس مش قادر اسكت دمي بيغلي .. رحت بسرعة طبعت الورقة دي و وقفت وزعتها أدام الجامع ع المصلين و هما خارجين 
يمكن اكون عملت حاجة و يمكن اكون معملتش .. يمكن اكون اخترت عدم المواجهة .. بس فكيت عن نفسي شوية بالناس الكتير اللي وافقت .. و فشيت غلي في الاتنين تلاتة اللي قالولي عيب ميصحش..
و هذا مبلغ علمي 

الخميس، 7 يونيو، 2012

بالقانون


بالقانون
عيل صغير يتسجن حربي في مسيرة أو في وقفة
والحرامي ياخد براءة و المعيشة تبقي ناشفة
بالقانون .. اقدر ابيعك واشتريك
بالقانون .. اخد عنيك
واديك بدالها .. مبني وشوية كراسي
ما انت راسي .. دي مسرحية .. وانت ساكت
وطول ما انت ساكت .. الحق باهت
و كله عندي بالقانون
أصل القانون ده أصلا بتاعي .. ياااا شعب واعي
تشتكي رئيس العصابة للعصابة
تشتكي الحية و سمومها للأفاعي
يا شعب واعي  .. بالقاون
قانوني قانونه قانوننا احنا .. مالك ومالنا
بلدك يا كابتـن؟؟ .. دي اصلا بلدنا
هتقولي ثورة؟ .. حميناها احنا .. بعناها احنا
و الصف بعد ما كان كما السد المنيع .. صبح وقيع .. قبحه شنيع
مبقاش لا صف .. و لا يحزنون
وكله بالقانون