الأحد، 1 مايو، 2011

في الطريق إلي التلاتين


شعرتين بيض وسط السواد طالعين
وضرس أو سنة م البق مخلوعين
و شباب في ثانوي في يوم كده اتلموا
و هما بيكلموني قالوا لي "يا عمو"...
بقيت عمو رسمي مفيهاش كلام تاني
بقوم من نومي بدري ونفسي انام تاني
افطر سجاير وقهوة مظبوطة
من قبل حتى ما وشي يحتاج يشوف فوطة
مش لازم البس زي واحد (يونيفورم يعني)
ولازم انزل مينفعش اعاند
مينفعش اقول اصلي تعبان النهاردة
و لا. . أصل معنديش غير محاضرة واحده
بقيت موظف وليا راتب منتظم
ولازم ابقي ماشي رزين وملتزم
بسمع أغاني عفا عليها الزمان
كلامي كله حكمة ورزانة ومعلومات
و هزاري قديييييييم و معادش عندي افيهات
طول عمري ماشي عدل ودوغري
لا ليا خبرة و لا شكلي مغري
غير السيجارة مليش تجارب بالمرة
موجود لكني بتفرج ع الحياة من برا
لا ليا زوجة ولا عيال ولا بفكر
ولا شفت واحد ظروفه زيي ع الحلم دا يقدر
مملكش م الدنيا غير موبايلي وهدمتين
وعربية أبويا اللي اشتراها بالدين
تشوفني ماشي تقول ده ايه
راجل ومالي هدومه وبيه
ويمكن في جيبي مفيش جنيه
بتغاظ أوي م العيال الصغيرين
تلاقيهم خارجين من الدرس مأنجين
(يعني ماسكين ادين بعض أنجاجيه)
طب والنعمة بقول اشمعنا انا
اصلي اتفاجئت اني بلغت تلاتين سنة
ايوه في سنهم حبيت.... لكن في سري
كنت اما اشوف حبيبتي .. اطلع اجري
ولما قلتلها بحبك قلتها بكل خوف
ويوم ما مسكت ايدها ياااااه قتلني الكسوف
مش مهم ان الحكاية اتفركشت
ولا الدموع اللي في عنيا عششت
و عادي قلبي اللي اتقسم نصين
و عادي بردو اني اتقسمت اتنين
واحد حزين مجروح بيترعش م الخوف
و التاني أبيح لسانه مبرد ووشه مكشوف
الأبيح نازل اهانة وبستفة في المجروح
لما انت مش لاقي طب كنت ليه بتبوح
عايز تحب و كمان تتحب بسلامتك
اديك وقعت و كل الخلق قالوا يا خيبتك
و الجرح ينزف يوجع الاتنين
واحد بيبكي والتاني من ألمه بيسب له الد**
وقلت العياط ع الفايت ملوش داعي
ونفضت همي و هربت من اوجاعي
وبقيت موظف وليا راتب منتظم
ولازم ابقي ماشي رزين وملتزم
بسمع أغاني عفا عليها الزمان
علي الحجار  لما الشتا يدق البيبان
كلامي كله حكمة ورزانة ومعلومات
و هزاري قديييييييم و معادش عندي افيهات
كل اللي فات مش شعر و لا تفانين
دي صورة لشاب مصري سنه بلغ تلاتين

السبت، 23 أبريل، 2011

ترتيب الفتارين في أمر السلفيين

قرأت خبرا في جريدة اليوم السابع عن الشيخ ابو اسحاق الحويني و ده نص الخبر لقيت رد فعل أزعجني بصراحة.


طبعا اليوم السابع جريدة لا تتمتع باي مصداقية نهائي ومعظم اخبارها متفبركة بصراحة استفزتني صياغة الخبر اللي قلبت كلام عادي بين راجل كبير اعترك الحياة زي ما بيقولوا و شباب صغير لسه بيبتدي وسابت ده كله ومسكت في كلمة قالها الشيخ للتفكه و عملتها عنوان الخبر


و اللي يغيظك يا اخي اننا احنا اللي بندد بعمالة وحقارة اليوم السابع استقبلنا الخبر بكل حماس كأنه منزل و اسلوب بقي (مش قلتلكوا ؟؟ اهو وقع بلسانه) اشمعني دلوقتي بقت اليوم الساقع زي ما بيسموها حلوة و كلامها مصدق.


ايه التناقض ده منين بتقول انك ضد الحجر علي الحرية و بتحاسب الراجل علي كلمة عابرة استغلتها اقلام ملوثة عشان تهيص في الهيصة و للاسف احنا عملنا اللي هما عايزينه بالظبط حرية الرأي الموجهة ضد طائفة بعينها.


انا عن نفسي ضد الحرية اللي علي حساب الغير 


مينفعش اقول انا حر اشتم حد ايا يكن و كمان الناس حرة زي ما انا حر تقول اللي هي عايزاه 


و بعدين لما اتكلمت في الموضوع ده مع بعض أصدقائي الأعزاء فاجئني صجيقي العصبي بسؤاله" يعني ايه برنامجكم لحل المشاكل الاقتصادية؟"


و دخلت انا (معاهم) بقدرة قادر و انا يعلم الله لا لييا في الطور و لا في الطحين (هههههه) كا علينا.


اولا المنهج الاقتصادي الاسلامي بيتدرس في جامعات العالم و في جامعة الأزهر محاسبة اسلامية بالتوازي مع المحاسبة المالية و مسائلها بالدينار و الدرهم و محاسبة الزكاة بالتوازي مع محاسبة الضرايب العملية مش واحد ملتحي ماشي بكرباج يلم الجزية زي ما الاعلام صورها


تاني حاجة أسلوب حل المشكلات هو نفس اسلوب حل المشكلات بتاع الحكومة العادية الزام المعتدي من قبل السلطة بتأدية الحق لصاحبه لكن كمان أحسن في انك الظالم في النظام الوضعي ممكن يوصل لمرحلة ملوش فيها كبير و عندنا أمثلة سابقة زي مبارك و أمثلة حالية زي حبيبنا القذافي و بشار ابن .... الأسد


لكن في النظام الإسلامي الكبير دايما فيه اكبر منه اللي هو ربنا سبحانه و تعالي و اكبر مثال خدناه في الاقتصاد الاسلامي في كلية التجارة في جامعة الأزهر في فصل بعنوان النموذج الاقتصادي في عهد عمر بن الخطاب قوله الشهير "ويلك يا عمر لو ان بغلة تعثرت في العراق لسئل عنها عمر لما لم تمهد لها الطريق؟؟؟" يعني مش انسان اتنفخ في قسم و لا دهسته عربية السفارة دي بغلة و هي ماشية اتكعبلت و ملحقتش تقع


و انا علي فكرة مش غاوي تاريخ و لا قصص لكن ده فعلا علم درسناه في جامعة الأزهر في كلية التجارة قسم محاسبة و الكلية موجودة و كتبها موجودة للمراجعة.


ثالثا بالنسبة لموقف السلفيين من الاعتصامات انا عارف ان منهم قال الاعتصامات حرام لكن بردو منهم اللي كان في الميدان زي الشيخ محمد حسان و منهم اللي نفض تماما لكلام الشيوخ و نزل بردو يعني مهماش منزلين و لا كلامهم قرآن بشر بردو زينا لكن بس خلينا نتفق مين فينا متلخبطش أول الثورة و قال دي هوجة و هتنام و نتفق كمان ان الخروج علي الحاكم فعلا مكروه في الشرع لأنه يؤدي إلي الفوضي و عارف اني هتشتم بس دي الحقيقة و مفيش منها مفر فعلا مكروه لكن في حالة ايييييييه؟؟؟؟ في حالة انه ظالم مش قاتل و سارق و شافط و ناهب يعني اللي عملناه في مبارك مش حرام و لا مكروه لكن بردو في ناس بتاخد العلم حفظ مش فهم يعني 1+1=2 بدون تفكير مع ان ممكن اثبتلك انها تساوي 3 لو حسبتها بشكل تاني لكن هما واخدينه زي ما هو نقل مباشر (انا حاسس اني لفيت في الحتة دي و مش عارف اوصلها بردو).


رابعا صديقي العصبي قالي كلمة ظريفة أوي قالي يعني السلفيين لو جالهم عامل مظلوم بدل ما يقوله روح اتظاهر و اطلب حقك يقوله روح صلي؟؟؟؟


يا صديقي العزيز هو مين فينا كان يعرف يعمل حاجة في العهد اللي فات الله لا يعيده الواحد كان بيتهان و يتمرمط و نقوله عوضك علي الله قول حسبي الله و نعم الوكيل و ده السلفيين و غيرهم علي فكرة مش السلفيين بس.


أخيرا أحب اقول انا مش سلفي و ده مش هروبا من اني ابقي سلفي و لا ان السلفية عيب لكن عشان ميطلعش واحد أمور يقول لي عملاء السلفيين ظهروا و السلفيين احتلوا النت و واخد كام و الكلام الحلو ده (أيوة انت ياض) ههههههههه.






و أنا لا اوافق علي ان حد من السلفيين يمسك الحكم لأن مفيش منهم حد مناسب يحكم باسم الدين 


و كمان محدش فيهم هيوافق و تقدروا تجربوا بنفسكم






انا مش سلفي و بقولها و انا مكسوف من نفسي يا ريتني اقدر اتبع الرسول عليه الصلاة و السلام و صحابته عليهم رضوان الله و ابقي من الذين اتبعوهم باحسان حد يطول يبقي زي النبي عليه الصلاة و السلام "كان قرآنا يمشي علي الأرض" 


حاليا حسب آخر توصيف جالي من صديقي برضه (أصل أصدقائي كتار) اني ليبرالي بمرجعية إسلامية و ده عاجبني بصراحة و موافق عليه.


أحب أخيرا أعرض عليكم السيرة الذاتية للشيخ الجليل أبو اسحاق الحويني






و هذا مبلغ علمي وفوق كل ذي علم عليم


(شكلي سلفي بردو ههههههههه)

الأحد، 10 أبريل، 2011

ستين يوم



ستين يوم وانا اقوم م النوم ضاحك وشي كده ومبسوط



من غير حاجة بحب اليوم وبقوم في معادي المظبوط



ستين يوم و الأيام حلوة ماشية لذيذة وفل الفل



اسمع معلومة علي كلمة. التغيير فايت ع الكل



و شباب بينادي يا بلادي مش هنسيبك تاني تتهاني



و التحرير مش بس ميدان ده مقامنا و مسكننا التاني



هوب الاقيلك فجأة يا عم غراب البين نفض جناحاته



وطلع قال مسكين متألم و الفكر منغص أوقاته



بقي بتقول يا بجح يا حرامي ان ملكشي مليم برا



وفلوس الغاز والبترول؟ عبيتهم يا حيلتها في صرة؟



أرض الدولة اللي انت فاكرها بسبوسة ونازل تقسيم



وجمالك فاتح ع البحري معذور أصله حرامي غشيم



وحكاية هات أرض يا عمو في اكتوبر كما قال الراوي



كانوا الفين فدان ولا اكتر ؟ لو ناسي نجيب الكفراوي



دا انتوا مسيبتوش جيب مقفول حتى الأموات قلبتوهم



قال واحنا كنا فاكرين علشان اموات راح تنسوهم



قلبك والله فيه الخير جاي تتبرع و تهدينا



طب حنجيلك بكرة في شرم ونرقصك أجدع من دينا






أشوفكم في شرم





و هذا مبلغ علمي وفوق كل ذي علم عليم

الأربعاء، 6 أبريل، 2011

اصدق مين بقي ؟؟؟







السيد المشير طنطاوي سكت سكت و طلع مرة واحدة قال كلام خطير قوي ده نص المقال اللي بيقول فيه




صرح المشير محمد حسين طنطاوي رئيس المجلس العسكرى الاعلى فى لقاء صحفى مع صحيفة دير شبيجل الالمانية فى مصر ان بلاده تواجة خطرا كبيرا فى المرحلة المقبلة وان هناك ايدى عابثة كثيرة تعبت بالامن القومى المصرى .




واضاف المشير طنطاوي اصبحنا فى حيرة من امرنا اما مواجهة هذا الخطر الكبير او ان نوصف باننا نحارب الديمقراطية ، وحول الرئيس السابق مبارك قال طنطاوى ان المجلس العسكرى يواجة ضغوطا كبيرة ومن دول عربية ذات وزن كبير لعدم محاكمة مباركمبارك لحتى الان فى شرم الشيخ يضعف موقفنا بشكل كبير امام الشارع المصرى والثورة المصرية .




وبسؤال الصحيفة للمشير طنطاوي حول محاولة انقلاب تحدث عنها الفريق سامى عنان ، قال طنطاوى نعم كانت هناك اكثر من محاولة انقلاب منذ تخلى الرئيس السابق عن السلطة ولكننا واجهناها بكل قوة وحسم .




ولاول مرة اعترف طنطاوي لصحيفة دير شبيجل ان المجلس العسكرى هو من ضغط على مبارك للتنازل عن السلطة لاننا شعرنا وقتها ان البلد ستنقسم وستذهب الامور الى حيث لا يحمد عقباة واضاف طنطاوى مبارك تحت الاقامة الجبرية ولكن هاذا لا يمنع من وجود مؤيدين لة يريدون ان يوصلوا رسالة مفادها ان الامور بعد مبارك تدهورت بشكل كبير ونحن نسعى للتصدى لاى ثورة مضادة فى الشارع المصرى وحول الفريق احمد شفيق يقول طنطاوى كنا نرى انة رجل نظيف اليد وحاولنا مساعدتة لتحقيق انجازات ولكن الشارع المصري قال كلمتة والرجل لم يتحمل الضغوط فقدم استقالتة .




وحول علاقة مصر بايران قال طنطاوي ان مصر تعتبر ايران بلد اسلامى وليس عدو لمصر اطلاقا ونامل ان تكون المرحلة القادمة مرحلة علاقات ثنائية ومميزة بيننا وبينهم من اجل صالح البلدين .




ونفى المشير طنطاوى اى تفكير للمؤسسة العسكرية التقدم لانتخابات الرئاسة وقال ان مصر تحتاج لرئيس مدنى يحمية الجيش .




==========================




ده نص الكلام بتاعه




1- هو كده نفي كلام الرجالة المحترمة بتوعه و زمايله في المجلس العسكري او اللي المفروض انهم زمايله و اللي مفروض كمان انهم مش ناس هينة يعني اللي قالوا موضوع من تلقاء نفسه.




2- اعترف ان كان فيه محاولات للانقلاب من جوا الجيش.




3- اعترف بوجود الضغوط العربية لمنع محاكمة الرئيس.




4- اعترف بوجود مؤيدين عايزين يقولوا انه بعد رحيل مبارك الدنيا بقت فوضي.




واى من اولادة وقال طنطاوى ان وجود 




طب نرد بقي:




1- يعني ناس بالرتب الكبيرة الجامدة دي ينفع يا سيادة المشير يطلعوا يكدبوا علينا و يقولوا كلام غير الحقيقة و ليه سبتهم يقولوه ؟؟؟ مش كان واجب تمنعهم يضللونا كده؟؟ و بعدين بقي كده مبقيناش عارفين نصدق مين بصراحة سيادتك عارف اننا ناقصين وعي بشهادة كل واحد ربنا كرمه و طلع علي فضائية.




2- محاولات الانقلاب دي سببها ايه يا فندم ؟؟ ده أمر داخلي جوا الجيش ملناش فيه بس معلش يعني مش تشوف ولادك زعلانين من ايه و تراضيهم بدل ما تسيب كل واحد ربنا اداله و جاب كاميرا يطلع يقبح في جيشنا حبيبنا .. أظن ده مش وقته خالص البلد مش ناقصة الله يرضي عليكم.




3- يعني ايه ضغوط عربية عشان ميتحاكمش ؟؟ ليه؟؟ هو ابن مين يعني ؟؟ لو بيهددوا بطرد العمالة المصرية خلي شنب فيهم يعملها.. يعني معقول يهداو بلدهم عشان خاطره؟؟ ده المهندسين و الدكاترة و الفواعلية و العمال مصريين .. ايه يعني هو هوبا مستر فواز و لا ايه؟؟ و بعدين خلاص يا سيدي لو كده محلولة ديتها رحلة لشرم الشيخ توفر عليك الحرج تماما و تقدر تقول بكل براءة انا مالي الشعب راح جابه اعمل لهم ايه ؟؟؟ 




4- المؤيدين دول كام واحد؟؟ مليون ؟؟ مين احق يعيش ؟؟ مين صوته أعلي؟؟ يا سيادة المشير المؤيدين معروفين بالاسم و انا كمواطن مصري أوعدك و أقسم بالله العظيم انهم لو اتلموا و اتحبسوا مهما يقولوا مش هسمعهم و هقول دي هرتلة مساجين و رمي بلا و اي حد اعرفه يحاول يسمع كلامهم هعوره و اخش لهم و ربنا يقدرنا علي فعل الخير بقي..













يا سيادة المشير انا مواطن مصري غلبان لا ليا ضهر و لا انا ابن فلان انا عايز اشوف بلدي نضيفة بقا و الله تعبت يا فندم 




يا سيادة المشير احنا مطالبنا محددة نفذها لنا و النبي و محدش هيفتح بقه و الله و اللي هيفتح بقه هنخيطهوله عشان معادش يفتحه تاني




احنا مطالبنا: 

1- محاكمة مبارك واسرته واسترداد اموالنا منه

2- محاكمة الثلاثي المرح

3- حل الحزب الوطني وتجميد نشاط اعضائه

4- اشراف قضائي وحقوقي على جهاز الامن الوطني








و هذا مبلغ علمي و فوق كل ذي علم عليم

بكرة و بعده - بكرة و بعده



بصراحة أنا عايز أتكلم عن الفيديوهات بتاعة ظباط الجيش اللي ناس كتير بتقول انها مدسوسة و الناس دي انا بحترمها و بقدرها و علي رأسهم الأستاذة الكبيرة نوارة نجم


بصراحة انا شايف الكلام بردو مش بعيد عن التصديق.. هو في حاجة من اللي حصلت الشهرين اللي فاتوا كان ممكن حد يصدقها؟؟


و بعدين يعني بصراحة فيه ناس كبرت و ناس قدمت و بقي عليها تراب و فيه ناس عفنت و طلع لها ريحة يعني هو مش سن المعاش 60 و لا ايه؟؟؟؟؟؟؟؟؟؟؟


و بصراحة لو الكلام زي ما بيقولوا كده يبقي فل أوي .. أولا مفيش ظابط هيضرب زميله و ده علي حد قولهم بردو و مع احترامي للأستاذة نوارة بتقول الظابط ملوش حق يتظاهر و الشرطة العسكرية من حقها تضربه بالرصاص أظن لو رصاصة اضربت علي ناس وسط المتظاهرين يبقي اللي ضربها و المجلس العسكري من وراه راحوا فطيس.


ثانيا و ده الأهم هنخلص بجد من كل بواقي النظام القديم و اللي كان مختارهم مبارك بردو


و علي كل الأحوال كلها بكرة كلها بكرة بس وبعدوا تبان كل حاجة و يبان لو فطش ولا بحق و حقيقي الفيصل بينا الميدان و الميدان مش بعيد يا جماعة جم أهلا و سهلا البحر يحب الزيادة مجوش مش هينقصونا كتير.


و في الحالتين مش لازم نشتت تركيزنا جم مجوش احنا مطالبنا محددة:


1- محاكمة مبارك واسرته واسترداد اموالنا منه
2- محاكمة الثلاثي المرح
3- حل الحزب الوطني وتجميد نشاط اعضائه
4- اشراف قضائي وحقوقي على جهاز الامن الوطني





و هذا مبلغ علمي وفوق كل ذي علم عليم

الثلاثاء، 5 أبريل، 2011

امتي يمشي الغراب؟؟



تلاتين سنة وغراب كئيب قاعد في بيتنا
مسود عيشتنا وف كل حتة قالل قيمتنا
تلانين سنة وغرابنا ينعق لما خلاها خرابة
تعليم مفيش ولا لقمة حلوة واللي حامينا ديابة
تلاتين سنة عايش مطاطي وجوا بلدي مقامي واطي
بمشي في مجاري ودمي جاري والبركة في الديمقراطي
ورجع قالك داحنا بنعمل من أجلك أنت
انت اللي معفن ومن كرمنا نمت و ركنت
دانت في امان وسلام ومدلع في الاستقرار
وكفاية الطلعة الجوية وخفة دم الطيار
عايزمننا ايه تاني ؟؟ نعمل لك ايه يا زفت الطين؟؟
مش جبنا لك برشلونة وقاعد تسمع تامر وشيرين
فيها ايه لو دخلت القسم و اتبهدلت حبة؟
ده الاهانة و الانتهاك ده دليل محبة
وفضلنا متنعمين قول كده تلاتين سنة
وأمن الدولة بصراحة كان معيشنا في هنا
بس تقول ايه في قلة الأصل والندالة
ده طبع فينا من طول الزمان ومش محتاج قوالة
طلعنا يوم وقلنا للغولة في عينها ياغولة
وقلنا بلدنا في كل شيء لازم تكون الأولي
وجم سباع الأمن لجل من نفسينا يحمونا
أصل احنا مش واعيين قرشين ولقمة يزقونا 
سقنا الندالة وقلنا احنا هنا قاعدين
و الشارع لينا والأرض والأدان والجرس شاهدين
صعب حالنا عليهم من التعب و الجوع
جابولنا معطر جو بريحة مسيل الدموع
وبقينا عملا و بنتكلم كل لغات الدنيا
ولو سمعنا صوت دانة دبابة هنجري في ثانية
و منعنا عن الناس الريش و البيتزا
مكناش نعرف انكوا مربيين ديب لا مؤاخذة
وفتح الورد الجميل في جناين مصر 
و اتبني في الجنة قول ييجي ألف قصر
ومشي الغراب و البلد بقي ليها لون
و الفرحة من عزمها قلبت جنون
اللي قاعد يصرخ و اللي بتزغرط و اللي قال الله أكبر
و اللي مش عارف يعيط و لا يضحك ولا يكشر
يعني مش هنبقي تركة للمدام و عم الشباب
يعني بكرة مفيش مبارك؟ معقولة فجأة الهم داب؟
يعني خلاص مش هنقعد تقطعنا الظنون
مستنيين هرية قلوبنا وأيها المواطنون
قلنا هنرتاح بقي والحياة هيبقي لها طعم
لقيناه عايش مأنتخ في قصر الرياسة في شرم
ينفع كده يا جيشنا يا محترم يا غالي يا مانع الكوسة
يفضل جنابه مهيص و اخواتنا محبوسة
تقولوا مش لاقيين له تهمة غير لعبه في الأموال لو ثبتت
طب و العيال اللي بتتحاكم عسكري و في المتحف اتنفخت
أمانة عليك يا جيشنا زي ما حميتنا 
تجيب لنا حقنا م اللي خرب بيتنا





و هذا مبلغ علمي و فوق كل ذي علم عليم

الجمعة، 1 أبريل، 2011

في إيه بقاااااااا



تحديث:-

صديقي اللي كان في مظاهرة بورسعيد مشافش ضرب الرصاص بعنيه هو سمع بس و لما رجع يشوف مقدرش يحدد مصدر الضرب

=x=x=x=x=x=x=x=x=x=x=x=x=x=x=x=x=x=x=x=

هو في ايه؟؟


انا مش عارف في ايه بجد!! اللي حصل النهاردة في بورسعيد غريب


انا رحت ميدان الشهدا اللي هو المسلة يعني حسب الاتفاق اللي كان حاصل عشان اشارك في الجمعة ملقيتش حد و كل الحياة عادي


و بعدين سمعت ان المسيرة في شارع التلاتيني


رحت التلاتيني ملقيتش حد


دخلت علي تويتر لقيت واحد بورسعيدي بيقولي فضوها 


فضوها ازاي يا عم قالي والله بقت بتاع ستين واحد و سبتهم في المنشية و روحت و الناس كلها بتتريق عليهم


و الجيش قالهم التلاتيني براحتكوا لكن محدش هيروح ناحية المحافظة و لما حاولوا يروحوا ناحية المحافظة ضربوا نار في الهوا (الجيش) عشان يمنعوهم


انا كده قلقان علي فكرة !! التلاتيني من أزحم الشوارع يوم الجمعة بالذات عشان كل اللي بييجوا من المحافظات التانية عشان يتسوقوا بيبقوا فيه كلهم و بكده كل اصحاب المحلات لازم يهزقوا اللي عامل مسيرة عشان شايفين انهم هيوقفوا رزقهم عشان لسة الناس مش شايفة الصورة الكبيرة.


واضح ان اوامر الجيش واضحة ان محدش يتجمع في ميدان المسلة لأنه واسع و يشجع علي البيات خاصة انه جنينة كبيرة تساع ألفات


ده غير موقف التليفزيون المصري اللي كان جايب كرتون طول النهار مع انه مش غريب مع وجود واحد زي عبد اللطيف سبيرم 


طب ايه بقااا؟ نخلص من مبارك يطلع لنا مباركات



احنا تعبنا بقي من بطء السنين بتاعكوا ده .. ارحموا الشعب بقي .. متجروناش لسكة سودة ميعرفش اخرها غير ربنا عشان منبقاش ليبيا بجد عشان شعبنا دمه حامي و لما يحس ان حده بيخنقه بيتغابي و ابلغ مثال كلمة راجل سواق ميكروباص بيقول خلاص معادش خوف و الشرطة اللي كنا بنجري منها بقينا نبرق لهم و مستنيين حد فيهم يرد!!


يا قيادات جيشنا ارجوكم متضيعوش هيبة الجيش لأن ده هيبوظ حياتنا كلنا كلنا كلنا


و هذا مبلغ علمي و فوق كل ذي علم عليم

الثلاثاء، 29 مارس، 2011

قصيدة حلم (معرفش مين اللي كاتبها) بس كان نفسي يكون أنا



حلم بيجري جوا في قلبي يمكن قلبك شافه في يوم


حلم بيحلم بيه ستين سبيعن تمانين مليون


فجأة تشوف قرآن شغال في التليفزيون


و المارشات بعد القرآن و أغاني وطنية بميت لون


و الاسود يملا الصفحة الأولي في كل جرايد اليوم


الاسود يحكي كلام محزون


بس مخبي تحت الحبر الاسود فرحة


شعبنا زي عروسة بطرحة


فرحة بحتتة نتفة فرحة


و هو بيقرا نعي وفاتك خبى الضحكة تحت الصرخة


ايوة وفاتك


هو انت مبتموتش يا عم


مكتوب في بطاقة التموين حصة هم و ظلم و غم


نفسي امشي في جنازتك يوم


لو راح اموت بعديها بيوم


بس اشوف غيرك ع الكرسي


اسود ابيض طيب ظالم


اهبل عاقل جاهل عالم


مش راح تفرق


لو صبي عالمة و ابن عوالم


يااااااااااااااااااااااه


دنا من يوم ما وعيت ع الدنيا و صورتك واقفة قصادي


بسمة وشك تشبه لوح التلج الفاضي


واقف يتفرج علي حلمي و حلم بلادي


حلم ابويا و ابني و ولدي و ولد ولادي


و هو بيتكسر حواليك و بتدفنه في النار باديك


شوف كام مليون ماتوا و هما بيدعوا عليك


شوف كام مليون حسوا بذل و رفعوا اديهم حسبنوا فيك


شوف كام مليون في المستشفي


في قلب جنازة في حضن الزفة


علي اسوار المعتقلات


شوف كام مليون في الجامعات


مرميين وسط الطرقات


شوف كام مليون مصري دعاها


صحفي مهندس عاطل


ربة منزل اسطي مقاتل


نجار و مدرس و محامي


ميكانيكي و طالب و حرامي


كل الشعب بيدعي عليك


يصحي في يوم من النوم يلاقيك


نورت الطربة يا معاليك


كلمة أخيرة هقولها يا ريس


حقق حلم الشعب ده مرة


طول عمرك و انت بتسقيه الدنيا المرة


بس اللحظة اللي تموت فيها


صدقني يا ريس


هتبقي بسطته لأول مرة

حبايبي الأكتيفست



من أولها كده و من غير مقدمات و لا تحيات


انا مش عاجبني الأكتفيستس 


مش أشخاص بالعكس كلهم ناس زي الفل


و علي راسهم الانسانة اللي بحترمها جدا و بعتبر اي مساس بيها مساس باختي شخصيا الأستاذة المحترمة نوارة نجم


لكن طريقتهم مش عاجباني


عايزين الديمقراطية و اي حد يكلمهم في رأي غير رأيهم يخشوا فيه شمال 


اكيد طبعا مش كلهم بس فيه منهم كتير كده و انتوا عارفين نفسكم


و كلمتهم الشهيرة مش عاجبك كلامي اعملي ان فولو


ايه؟؟ ايييييه؟؟ 


احنا بنجمع و نقرب و لا بنوزع و نطرق


و كلهم قاعدين علي النت و فاكرين انهم يقدروا يغلبوا ناس بقالها سنين اكتر من عمري بتلف في كل خرم في مصر انا عاشرت جماعة الدعوة لأن عمي الله يرحمه كان فيهم كان ممكن الواحد فيهم يسيب بيته بالست شهورو اخوانه في الجماعة يتكفلوا بالبيت و طلباته و هو يطلع في سبيل الله وصلوا انهم خلصوا لف في مصر راحوا اوروبا وراحوا امريكا والله مرة طلعوا عمرة بعربية بيجو سبعة راكب مسابوش حتة غير لما وقفوا فيها علي طول الطريق ناس ظريفة مؤدبه بتقول قال الله وقال الرسول دايما بيلمعوا من النضافه ومبتسمين وريحتهم حلوة وبيلموا بعض ويساعدوا المحتاجين ويزورا العيانين في المستشفيات ازاي المواطن البسيط مينجذبلهمش والاخ الاشتراكي اللي قاعد علي تويتر يقول يحيا اتحاد العمال و الاخ الليبرالي والاخت الفيمنست والكلام المكعبر ده اللي الناس مش فاهماه و منهم اللي علي وشه غضب الله ومبيستحماش و يقول لك دي حرية شخصية و التانيه منظرها مستفز و مش مقبول و تقول حقوق المرأه طب ما نوارة نجم قالبة الدنيا و مشرشحة الكبير قبل الصغير وهي بحجابها و فيه من غير حجاب و مش مستفزين و لا بيتآلطوا ع الناس ده غير انهم معندهمش كبير اي حد ايا يكن عرضة للشتيمه و البهدله و النهارده مع واحد عشان شايفينه صح وساعة ما يعمل حاجه مش شايفينها صح يمسحوا بيه الأرض انا نفسي مخي وجعني من متابعتهم الاول عمرو موسي حلو وبعدين لا ده كلب النظام و البرادعي وحش لا حلو لا مستهدف لا ده تم تشويهه بطريقة متعمدة لمصلحة ناس معينين.


انا مش بقول ان كلهم وحشين و لا كلهم مستفزين لكن في منهم ناس بتعمل كده و عارفين نفسهم


يا جماعة احنا شباب صغير قليل منا اللي جاب اربعين سنة دي ناس منهم اللي بقاله فعلا اربعين سنة بيلف في كل حتة و بيكلم كل الناس الصغير قبل الكبير نعمل زيهم ننتشر وسط الناس نوعيهم و نفهمهم.


لو كانت الناس فاهمة كان ممكن حازم شومان يطلع يقول اللي قاله؟؟؟


و مع ذلك انا ضد شتيمتهم لأنه أولا مش هيرد عليك فرصيده الكبير فعلا عند الناس هيزيد و تبقي حجة عليك ثانيا ان منهم ناس وصلت لقيمة كبيرة جدا في العلم الشرعي و مش هتكلم علي ناس معينة و لا اسامي بعينها عشان انتوا ربنا حارسكم و صاينكم مخليتوش.


انا حبيت اقول الكلمتين دول و رزقي علي الله و عارف اني ممكن اكل عليهم شتيمة تكفيني عشر سنين قدام.


في الختام


هذا مبلغ علمي و فوق كل ذي علم عليم