الثلاثاء، 29 مارس، 2011

حبايبي الأكتيفست



من أولها كده و من غير مقدمات و لا تحيات


انا مش عاجبني الأكتفيستس 


مش أشخاص بالعكس كلهم ناس زي الفل


و علي راسهم الانسانة اللي بحترمها جدا و بعتبر اي مساس بيها مساس باختي شخصيا الأستاذة المحترمة نوارة نجم


لكن طريقتهم مش عاجباني


عايزين الديمقراطية و اي حد يكلمهم في رأي غير رأيهم يخشوا فيه شمال 


اكيد طبعا مش كلهم بس فيه منهم كتير كده و انتوا عارفين نفسكم


و كلمتهم الشهيرة مش عاجبك كلامي اعملي ان فولو


ايه؟؟ ايييييه؟؟ 


احنا بنجمع و نقرب و لا بنوزع و نطرق


و كلهم قاعدين علي النت و فاكرين انهم يقدروا يغلبوا ناس بقالها سنين اكتر من عمري بتلف في كل خرم في مصر انا عاشرت جماعة الدعوة لأن عمي الله يرحمه كان فيهم كان ممكن الواحد فيهم يسيب بيته بالست شهورو اخوانه في الجماعة يتكفلوا بالبيت و طلباته و هو يطلع في سبيل الله وصلوا انهم خلصوا لف في مصر راحوا اوروبا وراحوا امريكا والله مرة طلعوا عمرة بعربية بيجو سبعة راكب مسابوش حتة غير لما وقفوا فيها علي طول الطريق ناس ظريفة مؤدبه بتقول قال الله وقال الرسول دايما بيلمعوا من النضافه ومبتسمين وريحتهم حلوة وبيلموا بعض ويساعدوا المحتاجين ويزورا العيانين في المستشفيات ازاي المواطن البسيط مينجذبلهمش والاخ الاشتراكي اللي قاعد علي تويتر يقول يحيا اتحاد العمال و الاخ الليبرالي والاخت الفيمنست والكلام المكعبر ده اللي الناس مش فاهماه و منهم اللي علي وشه غضب الله ومبيستحماش و يقول لك دي حرية شخصية و التانيه منظرها مستفز و مش مقبول و تقول حقوق المرأه طب ما نوارة نجم قالبة الدنيا و مشرشحة الكبير قبل الصغير وهي بحجابها و فيه من غير حجاب و مش مستفزين و لا بيتآلطوا ع الناس ده غير انهم معندهمش كبير اي حد ايا يكن عرضة للشتيمه و البهدله و النهارده مع واحد عشان شايفينه صح وساعة ما يعمل حاجه مش شايفينها صح يمسحوا بيه الأرض انا نفسي مخي وجعني من متابعتهم الاول عمرو موسي حلو وبعدين لا ده كلب النظام و البرادعي وحش لا حلو لا مستهدف لا ده تم تشويهه بطريقة متعمدة لمصلحة ناس معينين.


انا مش بقول ان كلهم وحشين و لا كلهم مستفزين لكن في منهم ناس بتعمل كده و عارفين نفسهم


يا جماعة احنا شباب صغير قليل منا اللي جاب اربعين سنة دي ناس منهم اللي بقاله فعلا اربعين سنة بيلف في كل حتة و بيكلم كل الناس الصغير قبل الكبير نعمل زيهم ننتشر وسط الناس نوعيهم و نفهمهم.


لو كانت الناس فاهمة كان ممكن حازم شومان يطلع يقول اللي قاله؟؟؟


و مع ذلك انا ضد شتيمتهم لأنه أولا مش هيرد عليك فرصيده الكبير فعلا عند الناس هيزيد و تبقي حجة عليك ثانيا ان منهم ناس وصلت لقيمة كبيرة جدا في العلم الشرعي و مش هتكلم علي ناس معينة و لا اسامي بعينها عشان انتوا ربنا حارسكم و صاينكم مخليتوش.


انا حبيت اقول الكلمتين دول و رزقي علي الله و عارف اني ممكن اكل عليهم شتيمة تكفيني عشر سنين قدام.


في الختام


هذا مبلغ علمي و فوق كل ذي علم عليم

هناك تعليق واحد:

  1. الله ينور عليك و يا ريت منقلبش الثوره و نعمل زى اليهود اى حد ضدهم يبقو ضد الساميه و مش معنى انى اختلف معاك فى الراى ابقى تابع لامن الدوله او تابع للحزب الوطنى او اى من هذه التفاهات و بالنسبه للاخوان فلهم ما لهم و عليهم ما عليهم لا يوجد حزب ولا يوجد شخص كاملكامل فالكمال لله وحده

    ردحذف