الاثنين، 7 يناير 2013

أذان من مالطا .. اربعون عاما تتيهون


قررت أن أعتلي اليوم مأذنة مالطا الكبري .. اسمحولي اطلع عليها و ائذن شوية و أهو ابقي بعبعت باللي جوايا بدون طائل كالعادة
احب اقولكم مفاجأة .. شعبنا جاهل .. أييييييوة جاهل و ابن جاهل .. و بشكل متعمد و ممنهج و موجه و بيتلعب عليه كل الألعاب بداية من الطفولة مفيش تعليم كويس يخليك تحب تبحث أو تقرا انت يا دوب بتفتح الكتاب ليلة الامتحان عشان تصبح ترجع اللي قريته و تتمني تخلص تعليم عشان تبطل قراية .. لغتنا العربية كتابة و قراءة صفر .. ومش بتكلم علي أطفال بتكلم علي دكاترة و  مهندسين لأن دول آخر ناس خدت عربي .. دلوقتي الأطفال بتتكلم العربي بس بالعافية و بيكتبوه فرانكو .. و اللي بيفلت من الدايرة دي  بسبب معجزة ما و لأسباب عجائبية يحب البحث العلمي و يقرا ويدور –لاحظ اني مقلتش يتفوق عشان تعليم الحفظ بتاعنا ممكن تتفوق فيه بدون ادني ثقافة ولا تعليم كمان المهم تحفظ علي بال ما تمتحن و انسي بكرة- .. بيتم تضييق الخناق عليه و كبته و محاصرته في دواير الروتين لحد ما يموت .
الغلابة والمهمشين و اللي عايشين في العشوائيات او تحت خط الفقر زي ما بنقول مقصود تماما انهم يبقوا غلابة و مهمشين و يبقوا عارفين دايما انهم تحت و البهوات فوق و اي حد ببدلة يبقي ابن ناس و نضيف و لازم يؤمنوا تماما ان ولاد الناس النضاف ليهم حقوق علي الغلابة اللي زيهم و حسناتهم نعمة واجبة الشكر .. ربنا يديهم و يزيدهم يا رب.. طب حد قال للغلبان المهمش ده مرة ان له حق؟؟ جرب تعملها .. قوله ليك حق .. هيقولك ياعم الحداية مبتحدفش كتاكيت .. انا غلبان وفي حالي .. هو اللي بيروح عند الحكومة بيرجع .. كل ده اتزرع في وعيهم عن عمد.
من الحاجات الشهيرة أوي في الثورة الشاب البسيط اللي بيقول للشاب (اللي شكله متعلم) ارجع انت و سيبني اموت .. انتوا اهم للبلد .. طبهو مثلا كان اطلع علي شهاداته و شاف انه عالم فيزياء نووية و عرف انه اهم للبلد؟؟
منين أيقن في لحظة وسط الضرب و الموت و الغاز و الدم ان الشخص ده أهم منه ولازم يحافظ عليه؟؟
العملية تجذير مفهوم الطبقات و ان ابن الناس النضيف مهم وانت لأ .. انت فيه منك كتير هو لأ .. انت عارف ده أهله صرفوا عليه كام؟؟ انت عارف ده بقي دكتور في كام سنة؟؟ انت عارف البدلة الميري اللي هو لابسها دي بكام؟؟
الحكومة لعبت علي الجهل ده و خلقت جميع الأوهام الممكنة وهم الرئيس الأب القائد الزعيم الذي لا يأتيه الباطل من بين يديه أو من خلفه وهم الباشا الظابط و الباشا الأمين ومعالي السيد الذكتور الوزير المحافظ الناس دي مبتغلطش .. يعني احنا هنعرف زيهم؟؟
من النكت العميقة أوي و اللي أتمني يكون اللي طلعها أيا كان قاصدها زي ما انا فهمتها.. نكتة الدكتور اللي قال للراجل البسيط البقاء لله يا حاج ابنك مات .. و الولد طالع من أوضة الكشف يقوله أنا مموتش يا ابه .. قاله اسكت يا ابن الكلب انت هتفهم أحسن من الدكتور.
الشعب المجهل ده محتاج حاجة توجهه ميقدرش يقول لها لأ .. أكيد ربنا .. يبقي ربنا بيقول الخروج ع الحاكم حرام .. و الشيوخ بتقول كلام ربنا يعني هيكدبوا؟؟  يعني انت هتفهم أحسن من الشيخ الدكتور الأستاذ .. انت مش شايف دقنه قد ايه؟؟
و النتيجة .. رموز جوفاء لا تسمن و لا تغني من جوع و مفيش فيها واحد ينفع يبقي قيادة حقيقية ولا واحد .. سببوا معضلة لطيفة أوي اسمها و تجيب مين .. تمشوا مبارك؟ و تجيب مين؟ تمشوا الجيش؟ و تجيب مين؟ تمشي مرسي؟ و  تجيب مين؟
مفيش مصري واحد بيحترم حد او بيحب حد لسبب منطقي .. سبب موضوعي مش شخصي .. طبعا انا بتكلم ع السواد الأعظم مش القلة اللي فهمت بالصدفة
مبارك ..ده بابانا صاحب الطلعة الجوية
الجيش ده اللي حامينا و اللي رجع سينا و أكيد طنطاوي يعني عمل حاجة
مرسي ده الراجل بتاع ربنا اللي حافظ القرآن و بعدين ده دكتور مهندس .. الاتنين يعني شوف  كان جايب كام في المية في ثانوي.
البرادعي ده الراجل الخبرة المحترم الليبرالي المتحرر اللي جايب معاه نهضة الغرب
حمدين المناضل اللي اتسجن كتير و قومي و اشتراكي و كده
ابو اسماعيل .. يا جدع ده عامل حتة موسوعة في السيرة النبوية و بعدين ده اوباما بيخاف منه
اشاعات و  دعاية موجهة و مواقف منها ما يحترم و منها المفتعل
و الكل بيلعب ع الجهل .. محدش عايز يعلم الناس .. حتي المعارضة .. بدل ما نعلم الناس ان ليهم حق .. نقولهم ده القائد اللي هيديكم حقكم .. بس الحقوق لا تمنح
و كله بيعمل كده طنطاوي و مرسي و حمدين و البرادعي و ابو اسماعيل و كله كله سواء بشكل مباشر او غير مباشر
و عشان كده كلهم بيحموا بعض من الأول .. السجان و المسجون .. اللعبة قواعدها معروفة اسجنك النهاردة و تسجني بكرة و كله في الاتفاق .. المسجون اللي فلوسه و مشاريعه و جماعته مالكة نص البلد يبقي مضطهد ازاي؟؟ و اللي جاي من برة بحلم التغيير يقعد مع عسكر النظام و احنا بنموت في محمد محمود يقولهم انا مستعد اقبل رئاسة الوزراء و  احنا بنعرض عليه يستلم السلطة كلها بدمنا؟؟ و الشيخ بتاع ربنا الكذاب اللي ياخدك البحر و يرجعك عطشان و لا مين و لا مين و لامين.

كل اللي حصل مفاجأة أخدت تمانتاشر يوم عشان يفوقوا منها و يظبطوا خطتهم علي المعطيات الجديدة .. مفاجأة لن تتكرر مرة تانية وتم التأكد من ده
الميدان بقي مرتع للبلطجية و الثوار اللي متحبسش و متقتلش منهم اتشوه معنويا و الحركات الثورية عميلة وقابضة وكل من تسول له نفسه التحدث عن الثورة و الحق بقي كفار و شواذ بمساعدة المدعين الأفاقين اللي أبرأ إلي الله بنفسي و ديني منهم اللي بيطلعوا في القنوات الدينية يمجدوا الحاكم.
الغالبية المجهلة بمختلف مستوياتها و درجات تعليمها خلاص .. مش هتقرب ناحية الحاجات الكخ دي تاني .. اتعرفوا ان دول أعداء الدين
حتى النخبويين جميعا و انا منهم .. اللي هما كل واحد فاهم أو فاكر نفسه فاهم مستنيين ايه؟؟
ثورة الجياع .. الغلابة متلاقيش تاكل تبدي تخرب و تسرق ..
انما محدش بيحاول ان الفقير يفهم انه له حق و يطلع يطالب بيه من غير تكسير و لا تخريب .. محدش عارف يفهمهم ان دي بلدهم و ان السلطة هي العدو مش اخوك المواطن اللي زيك .. اللي معاه خايف و اللي معاهوش بيبصله بحقد و مستني لحظة ما يخطف منه .. و سايبين اللي فوق اللي سارق من الكل ..الطبقية و استغلال الجهل متجذرة جوانا زيهم و احنا جهلة زيهم .. الانتفاضة حصلت و الغلابة فرحت بالهيصة ..
متخيل احساس الراجل الغلبان اللي كسر اللات؟؟
عاش طول عمره يعبد فيه و فجأة لقاه بيتكسر..  أول ضربة ضربها بخوف و التانية لما ملقاش رد زاد عزمها .. اللات اتهز و وقع .. لكن بردو فضل يعبد صنم .. اللات وقع بس العزى مازال قائم ..
اللي حصل تم التأكد انه لن يتكرر .. الأمل في الوعي .. عرف صاحب الحق ان له حق ومش عيب يطلبه .. اربعون عاما في الصحراء تتيهون .. هذا قولي لكم

هناك 3 تعليقات: