السبت، 23 أبريل، 2011

ترتيب الفتارين في أمر السلفيين

قرأت خبرا في جريدة اليوم السابع عن الشيخ ابو اسحاق الحويني و ده نص الخبر لقيت رد فعل أزعجني بصراحة.


طبعا اليوم السابع جريدة لا تتمتع باي مصداقية نهائي ومعظم اخبارها متفبركة بصراحة استفزتني صياغة الخبر اللي قلبت كلام عادي بين راجل كبير اعترك الحياة زي ما بيقولوا و شباب صغير لسه بيبتدي وسابت ده كله ومسكت في كلمة قالها الشيخ للتفكه و عملتها عنوان الخبر


و اللي يغيظك يا اخي اننا احنا اللي بندد بعمالة وحقارة اليوم السابع استقبلنا الخبر بكل حماس كأنه منزل و اسلوب بقي (مش قلتلكوا ؟؟ اهو وقع بلسانه) اشمعني دلوقتي بقت اليوم الساقع زي ما بيسموها حلوة و كلامها مصدق.


ايه التناقض ده منين بتقول انك ضد الحجر علي الحرية و بتحاسب الراجل علي كلمة عابرة استغلتها اقلام ملوثة عشان تهيص في الهيصة و للاسف احنا عملنا اللي هما عايزينه بالظبط حرية الرأي الموجهة ضد طائفة بعينها.


انا عن نفسي ضد الحرية اللي علي حساب الغير 


مينفعش اقول انا حر اشتم حد ايا يكن و كمان الناس حرة زي ما انا حر تقول اللي هي عايزاه 


و بعدين لما اتكلمت في الموضوع ده مع بعض أصدقائي الأعزاء فاجئني صجيقي العصبي بسؤاله" يعني ايه برنامجكم لحل المشاكل الاقتصادية؟"


و دخلت انا (معاهم) بقدرة قادر و انا يعلم الله لا لييا في الطور و لا في الطحين (هههههه) كا علينا.


اولا المنهج الاقتصادي الاسلامي بيتدرس في جامعات العالم و في جامعة الأزهر محاسبة اسلامية بالتوازي مع المحاسبة المالية و مسائلها بالدينار و الدرهم و محاسبة الزكاة بالتوازي مع محاسبة الضرايب العملية مش واحد ملتحي ماشي بكرباج يلم الجزية زي ما الاعلام صورها


تاني حاجة أسلوب حل المشكلات هو نفس اسلوب حل المشكلات بتاع الحكومة العادية الزام المعتدي من قبل السلطة بتأدية الحق لصاحبه لكن كمان أحسن في انك الظالم في النظام الوضعي ممكن يوصل لمرحلة ملوش فيها كبير و عندنا أمثلة سابقة زي مبارك و أمثلة حالية زي حبيبنا القذافي و بشار ابن .... الأسد


لكن في النظام الإسلامي الكبير دايما فيه اكبر منه اللي هو ربنا سبحانه و تعالي و اكبر مثال خدناه في الاقتصاد الاسلامي في كلية التجارة في جامعة الأزهر في فصل بعنوان النموذج الاقتصادي في عهد عمر بن الخطاب قوله الشهير "ويلك يا عمر لو ان بغلة تعثرت في العراق لسئل عنها عمر لما لم تمهد لها الطريق؟؟؟" يعني مش انسان اتنفخ في قسم و لا دهسته عربية السفارة دي بغلة و هي ماشية اتكعبلت و ملحقتش تقع


و انا علي فكرة مش غاوي تاريخ و لا قصص لكن ده فعلا علم درسناه في جامعة الأزهر في كلية التجارة قسم محاسبة و الكلية موجودة و كتبها موجودة للمراجعة.


ثالثا بالنسبة لموقف السلفيين من الاعتصامات انا عارف ان منهم قال الاعتصامات حرام لكن بردو منهم اللي كان في الميدان زي الشيخ محمد حسان و منهم اللي نفض تماما لكلام الشيوخ و نزل بردو يعني مهماش منزلين و لا كلامهم قرآن بشر بردو زينا لكن بس خلينا نتفق مين فينا متلخبطش أول الثورة و قال دي هوجة و هتنام و نتفق كمان ان الخروج علي الحاكم فعلا مكروه في الشرع لأنه يؤدي إلي الفوضي و عارف اني هتشتم بس دي الحقيقة و مفيش منها مفر فعلا مكروه لكن في حالة ايييييييه؟؟؟؟ في حالة انه ظالم مش قاتل و سارق و شافط و ناهب يعني اللي عملناه في مبارك مش حرام و لا مكروه لكن بردو في ناس بتاخد العلم حفظ مش فهم يعني 1+1=2 بدون تفكير مع ان ممكن اثبتلك انها تساوي 3 لو حسبتها بشكل تاني لكن هما واخدينه زي ما هو نقل مباشر (انا حاسس اني لفيت في الحتة دي و مش عارف اوصلها بردو).


رابعا صديقي العصبي قالي كلمة ظريفة أوي قالي يعني السلفيين لو جالهم عامل مظلوم بدل ما يقوله روح اتظاهر و اطلب حقك يقوله روح صلي؟؟؟؟


يا صديقي العزيز هو مين فينا كان يعرف يعمل حاجة في العهد اللي فات الله لا يعيده الواحد كان بيتهان و يتمرمط و نقوله عوضك علي الله قول حسبي الله و نعم الوكيل و ده السلفيين و غيرهم علي فكرة مش السلفيين بس.


أخيرا أحب اقول انا مش سلفي و ده مش هروبا من اني ابقي سلفي و لا ان السلفية عيب لكن عشان ميطلعش واحد أمور يقول لي عملاء السلفيين ظهروا و السلفيين احتلوا النت و واخد كام و الكلام الحلو ده (أيوة انت ياض) ههههههههه.






و أنا لا اوافق علي ان حد من السلفيين يمسك الحكم لأن مفيش منهم حد مناسب يحكم باسم الدين 


و كمان محدش فيهم هيوافق و تقدروا تجربوا بنفسكم






انا مش سلفي و بقولها و انا مكسوف من نفسي يا ريتني اقدر اتبع الرسول عليه الصلاة و السلام و صحابته عليهم رضوان الله و ابقي من الذين اتبعوهم باحسان حد يطول يبقي زي النبي عليه الصلاة و السلام "كان قرآنا يمشي علي الأرض" 


حاليا حسب آخر توصيف جالي من صديقي برضه (أصل أصدقائي كتار) اني ليبرالي بمرجعية إسلامية و ده عاجبني بصراحة و موافق عليه.


أحب أخيرا أعرض عليكم السيرة الذاتية للشيخ الجليل أبو اسحاق الحويني






و هذا مبلغ علمي وفوق كل ذي علم عليم


(شكلي سلفي بردو ههههههههه)

هناك 4 تعليقات:

  1. الله عليك ياجنرال هو دا الكلام ولا بلاش لما احب اختلف مع حد اختلف باحترام فرق كبير بين اختلافنا على فكرة وبين اننا نشخصن الامور ونخليها طائفية وبعدين لما اقول حرية واسيب ناس تهرتل سورى يعنى وتغلط وتقبح واقول دا رأيهم وما احجرش عليهم وبمجرد ما يتكلم شيخ انطلق زى المدفع انا قربت احس انو هجوم لمجرد الهجوم هجوم على الاشكال والاشخاص مش على الفكر خلونا نتناقش ونختلف فكلنا كلامنا يحتمل الصواب والخطأ ولما اعديها للمفرفشين المثقفين لما يعكو والعك يوصل للذات الالهية اعديها للسلفيين لما يقولو حاجة ما تعجبنيش لاهما اجبرونى على رأيهم ولا حتى السكينه على رقبتى ومش لما حد يدافع عنهم يبقى منهم هى مش تهمة اصلا ليه ما ادفعش عن حد وانا مختلفة معاه

    ردحذف
  2. اشطات يا جنرال... احب بس اضيف حتيته ان الخروج علي الحاكم مشكلته انه له شرطين: ١- الكفر البيان مش منه بس من افعاله كمان... ٢- ان يكون الخروج سيؤدي الي درء المفاسد و ليس الوقوع في فتنة اكبر من فتنة الحاكم و هو ده الشرط اللي اتلجلجو فيه كتير.... و قالو ان المظاهرات عمرها ما كانت مجدية اصلا و الناس هتموت علي الفاضي... انما كان برضه في مخرج من البدايه و هو ان الخروج المقصود هو الخروج المسلح و ليس السلمي و شكرا انك تعبت نفسك و جمعت كل الناقشه اللي دارت و اتفق معك في ردودك

    ردحذف
  3. مقال محترم ومتوازن

    ردحذف
  4. شكرا لكم ... دائما موفقين ..))


    umzug
    umzug
    umzug Wien

    ردحذف